Një tjetër sulm ka ndodhur ndaj Policisë së Kosovës mëngjesin e sotëm.

Vetura e pjestarëve të Policisë së Kosovës është sulmuar nga mjete shpërthyese, që dyshohet të jenë mjete piroteknike në në Sharpej të Jarinjës, shkruan arbresh.info

Policia e Kosovës njofton se sulmi ka ndodhur rreth orës 03:10.

“Sot, më 16.04.2022, rreth orës 03:10, në Sharpej të Jarinjës, kanë ndodhur dy shpërthime (dyshohet nga mjete piroteknike). Shpërthimet kanë ndodhur afër veturës së policisë e cila ishte në një pikë statike ku policia ishte e përqendruar në parandalim të kontrabandës në atë zonë. Nga shikimi i vendit të ngjarjes është vërejtur se në xhamin e veturës policore ka mbetur një copë letre (dyshohet mbështjellës i mjeteve piroteknike)”, raporton policia.

Ngjarja ka ndodhur në një pjesë që është afër territorit të Serbisë dhe dyshimi i bazuar është se këto mjete janë hedhur nga territori i Serbisë.

Sipas njoftimit, policia ka qenë duke monitoruar një rrugë ilegale të mbyllur kohë më parë dhe e cila përdorej për kontrabandë të mallrave.

“Nga ky rast, nuk ka persona të lënduar as dëme materiale. Policia është duke e trajtuar rastin dhe do të vazhdojë aktivitete operative për të parandaluar aktet kriminale trans-kufitare në atë zonë dhe ofrimin e sigurisë për të gjithë”, bënë të ditur policia. /arbresh.info/